森巴兵誓破意大利

嚟到國際賽期，今晚搶先上演一場超重量級熱身賽，由「足球王國」巴西喺瑞士日內瓦硬撼老對手意大利。「森巴兵團」今次搵嚟兩名「失意」巨星擔大旗，喺皇馬失寵嘅卡卡，以及被老球王比利批評做「門口狗」嘅尼馬同樣為省招牌，肯定會搏盡，相信唔難砌低素來畀佢哋恰死嘅「藍衫軍」，我捧1.81倍主勝！

巴西新帥史高拉利上月首度領軍出戰英格蘭，點知喺被一致睇好之下兵敗溫布萊，表現令人失望，今鋪為咗穩定軍心，梗會落必殺令求贏波。佢喺賽前點兵時話明要畀機會唔同球員考驗實力，上次射失12碼嘅朗拿甸奴同老將法比安奴今次齊齊落選，頂替佢哋做進攻核心嘅係近年喺皇馬坐多過踢嘅卡卡，不過呢位昔日AC金童近排狀態的確逐漸回勇，以佢卡士如果踢得番7、8成水平，已經唔嘢小。

比利轟掛住變髮多過踢波
前線方面，被譽為「新比利」嘅尼馬早前突然成為前輩批評目標，比利話佢每當離開巴西就冇料到，又鬧佢掛住搞髮型多過踢波。唔想做「水貨球王」，尼馬今鋪點都要Show啲真功夫啩？鬥志毋須懷疑！就算話佢哋賽前先後有拉美利斯、盧卡斯洛迪古斯同荷西保連奴退隊，都一樣冇有怕，唔好唔記得「森巴兵團」仲有奧斯卡杜斯山度士、迪亞高哥斯達等上位新國腳搏表現，整體實力應該喺意軍之上。

藍衫軍有後顧未必搏盡
意大利今場會着起嚟緊暑假洲際國家盃嘅新波衫出戰，主將派路話就話想着新衫攞威，不過佢哋仲要為下周鬥馬爾他場世界盃外圍賽保留實力，其中有傷在身嘅中堅基亞連尼尋日已經離開大本營，肯定缺陣，防線冇佢難免有多少混亂。僅餘無後顧之憂嘅只有下場停賽嘅防中迪羅斯同前鋒奧斯華度，成班波打硬仗唔夠決心實蝕底。

最重要一點，係意大利其實自82年世盃金童羅斯射爆巴西3:2後，至今超過30年未再贏過「森巴兵」，期間佢哋5次交手錄得2和3負，鋪鋪都畀巴西食住，今晚再遇剋星睇怕都係凶多吉少。

巴西近5戰交手未輸過
‧近5次交手巴西共得3勝2和，意大利有4場冇波入。

‧巴西近7戰有6場開出入球大。

‧意大利近8戰有6場開出入球大。

黃藍戰夾計做大騷
睇數據都知今場除咗玩主勝之外，最有機會開出嘅肯定係1.95倍入球大！巴西一向踢進攻足球，火力最畀到人信心。意大利雖然以防守出名，但其實新一代嘅「藍衫軍」鋒力同樣唔曳，「腦殘」巴洛迪利同「法老王」艾沙拉維喺AC默契幾好，嚟到國家隊一樣值得期望，如果佢哋入到1球，全場要開大應該唔係難事。