瑞士靠德甲8虎殺出血「路」
近排深陷經濟危機嘅塞浦路斯，國內情況家陣立立亂，球員仲有幾多心機去踢波真係難講？佢哋支國家隊今晚喺世界盃外圍賽歐洲區E組迎戰小組「一哥」瑞士，後者喺以梳頓沙基利為首嘅德甲8虎壓陣下，無論質素同默契都明顯勝一籌，唔難趁佢病、攞佢命。今場瑞士讓波，我捧2.38倍「讓客」！

世界排名14嘅瑞士，近年喺名帥希斯菲特帶領下，整體表現進步良多。球隊具潛質新星唔少，當中最受注目當然係年僅21歲，但已投身拜仁嘅梳頓沙基利。曾經教過拜仁嘅希帥，大讚呢位有「瑞士美斯」之稱嘅超新星，仲勁過當年跟過佢嘅普多斯基，話佢唔止技術好，勝在任何時刻都夠淡定。雖然梳頓沙基利今季喺拜仁做後備居多，但據報希帥嘅「4231」陣式入面，包括佢同史浩克04嘅「雪櫃兵」巴尼達都會齊齊擔任正選，話明信得過佢哋喎！

塞浦陷歐債危機損士氣
睇番瑞士今次點兵，除咗包括梳頓沙基利、巴尼達同戴迪約克呢啲喺德甲搵食球員之外，仲重召富咸中堅辛德路斯同錫耶納前鋒恩格辛艾馬加拉，其中後者自1月由法甲羅連安特轉戰意甲後，上陣8場就轟入5球，腳風超順，希斯菲特手上大把籌碼，要延續分組賽暫時4戰3勝1和嘅不敗氣勢又有幾難？

塞浦路斯呢邊，世界排名133真係好打有限，陣內搵個係頂級聯賽搵食嘅球員都冇，大部分都係土炮成員，睇佢哋依家4戰得3分排包尾就知唔夠砌啦！無疑佢哋今鋪有主場之利，不過該國近排成為新一輪歐債危機核心，全國上下都陷入混亂，球員有冇心踢？難講！球迷有冇心情嚟打氣更加唔知，睇怕今晚都等炒格啦！

賽制
53支球隊分9組進行雙循環賽事，9支小組首名直接出線決賽周，8支最佳小組次名將抽籤進行主客兩回合制附加賽，決定最後4個出線席位。

歐洲區E組