喜鵲作客例輸1粒 曼城「讓和」抵博

英超今晚戰火重燃，曼城喺主場迎戰紐卡素。曼城畀同市宿敵曼聯拋甩15分，成功衞冕嘅機會微乎其微，餘下嘅比賽只可以盡力而為。紐卡素喺數字上仲未上岸，鬥心十足，但衰在佢哋作客成績麻麻，曼城今晚極有機會靠質素小勝，「讓球和」有3.65倍咁好分，唔好走寶呀！

曼城陣內超過半隊係國腳，好似赫特、占士米拿、大衞施華等主力，全部都係國家隊常客，經過一輪國際賽，話冇影響真係講都冇人信啦，加上依家佢哋喺聯賽落後太多，爭勝心自然冇之前咁好，戰意成疑，想佢哋大勝對手，似乎大貪咗啲。

文仙尼見晒底難大炒
講到曼城最大嘅問題，係領隊文仙尼領軍能力見晒底，手執咁多好球員，但成績就唔成正比，有時見佢排陣同調兵遣將，根本都唔知佢想點！不過咁，論人腳質素，曼城始終喺紐卡素之上，加上班球星都慣晒自由發揮恃質小勝，今晚大有機會照辦煮碗。

紐卡素作客成績係英超倒數第2，僅得1勝5和9負，叫做好過雷丁少少，好彩，佢哋輸嗰9場波有6場都係僅以1球見負，未至任人魚肉。事實上，紐記陣中有卡比耶、馬維奧斯、奧巴坦同恩加麥比華一班默契十足嘅法國兵，戰鬥力唔差，加上佢哋仲要搶分，仍有一定能力同曼城周旋，「張峰」覺得今場波多數係1球上落，既然「讓球和」有3.65倍，當然吼得過啦！