拜仁打爆祖記

歐聯8強大戰今晚展開！德甲榜首拜仁慕尼黑率先喺主場迎戰意甲班霸祖雲達斯，兩隊波目前喺所屬聯賽都一枝獨秀，中後場實力亦不相伯仲，不過拜仁由列貝利、文迪蘇傑同湯馬士梅拿領導嘅鋒線遠勝祖雲達斯，今仗首回合可憑主場之利先下一城，主隊讓一球坐走望贏，1.92倍上盤抵玩。

其實拜仁同祖記都係阿占好欣賞嘅球隊，紐亞同保方都係當今球壇頂級門神，兩隊後防線亦係德國、意大利國家隊嘅班底，拜仁中場有舒韋恩史迪加同查維馬天尼斯控制戰局，祖記亦有派路同馬治斯奧兩大派牌高手，睇佢哋鬥法簡直係賞心樂事，亦係歐聯點解咁受歡迎嘅原因。

今屆10將入過波防不勝防
論攻擊力，被視為奪標熱門之一嘅拜仁鋒線就喺祖記之上，列貝利同洛賓都有超卓嘅突破能力，文迪蘇傑同馬里奧高美斯兩大空中霸王入球能力極高，湯馬士梅拿今屆更加以4球成為隊中歐聯首席射手。更恐怖係，拜仁今屆已經有10個唔同球員喺歐聯入過波，連後備前鋒比沙路、梳頓沙基利都開咗齋，上場聯賽更加大炒漢堡9:2，足見火力驚人。

相反，祖雲達斯進攻方面就弱得多，馬特尼、胡仙歷同加利亞雷拉都唔係多產射手，佢哋表現頗為飄忽，如果唔係祖記都唔使喺1月臨時臨急搵法國老將安歷卡返嚟救亡。祖記啱啱喺聯賽先至同國際米蘭大戰一場，今仗又要飛去慕尼黑作客，面對強勢拜仁輸兩粒有乜出奇。

筍盤：拜仁慕尼黑