紅軍變革成功 「主主」快扑錘
利物浦自從由羅渣士掌舵後，積極尋求改革，嚟到季尾漸見成效，今晚喺晏菲路迎戰韋斯咸前，更表明會同謝拉特續約，大大提升士氣。「張峰」深信愈戰愈勇嘅「紅軍」今晚可順利贏波，但主W得1.26倍略嫌冇肉食，倒不如博佢哋由頭贏到尾，要1.8倍「主主」。

p;向謝拉特提供5年新約

利物浦近幾季嘅成績對好多Fans嚟講肯定係唔收貨，不過「張峰」就有另一個睇法，自從領隊羅渣士今季執掌「紅軍」後，積極注入新元素同概念，經過半季摸索，加埋1月份轉會窗又簽入史杜列治、菲臘比古天奴等新星後，改革漸見成果，近5場聯賽就錄得4勝1負，表現提升唔少。

其中菲臘比古天奴喺前線起到一定作用，「紅軍」單係近6場就攻入18球，值得留意係入波唔再係集中喺蘇亞雷斯一個身上，謝拉特、達寧同佐敦軒達臣等中場都有唔少「士哥」，班波依家火力全開，喺晏菲路出擊更值得睇好！而且羅渣士又睇好「謝四」可踢至37歲，仲準備好一份5年新約，大大刺激士氣。

韋斯咸安祖卡路爾缺陣
韋斯咸陣中有兩個利物浦棄將，包括1月先由「紅軍」加盟嘅祖高爾今晚倒戈將成為焦點，可惜「貴價水貨」安祖卡路爾就因為外借條例唔踢得，大大削弱入球能力，再者「錘仔幫」作客例牌腳軟，近7戰就只有1勝6負，試問點擋得住日漸強大嘅利物浦？