卡迪夫城歎「查」開P 攞多1分肯定升英超 

英冠進入最後直路，今晚卡迪夫城主場出戰雖則和波肯定升班，不過話晒係主場出戰，有乜嘢好得過喺自己地頭贏波慶祝咁盡興吖，對手查爾頓啱啱逃離降班危機，作客嚟到無謂阻住人哋開派對，簡簡單單捧1.62倍主勝！

查爾頓護級上岸風流波
「一哥」卡迪夫城目前領先第3位嘅屈福特12分，喺剩番4輪嘅情況下，攞多1分直接升班資格就成囊中物。之不過佢哋上輪主場鬥諾定咸森林，對方要搏盡確保升班附加賽資格，點知都畀卡迪夫城輕描淡寫炒3蛋，除咗希古臣正選落場先拔頭籌，基斯泰迪後備入替更加梅開二度，個個前鋒都撻着晒，入波話咁易啦！

查爾頓之前徘徊喺降班邊緣，不過最近4場一口氣搶咗10分之後，終於正式解除降班危機，依家甚至有機會爭升班附加賽資格添，但前提係要諾定咸森林、李斯特城同保頓係咁失分先有價講，換句話講即係機會渺茫，既然依家高不成低不就心態成疑，睇怕都唔會阻住目標明確嘅卡迪夫城贏波開P啦！