飛腳蠱惑玩半和有得執

今日傍晚有成11場日乙任揀，但係睇嚟睇去，除咗5嘅大阪飛腳、11嘅神戶勝利船兩個主W，其他都似乎有啲抿水，諗嚟諗去，決定博飛腳呢隊蠱惑波個2.4倍半場和。

點解叫飛腳做蠱惑波？理由好簡單，大家睇吓佢哋個近績就清楚。呢班波今季降落日乙之後，保留咗大批日職級甚至國腳級嘅球員，實力响日乙超晒班，不過佢哋自開季以嚟8場聯賽雖然不敗，主場4戰居然和晒，係到作客先嚟料，輸盤輸到你暈，仲唔係蠱惑之霸？

今日佢哋响自己地頭對住升咗班一年嘅松本山雅，照計應該可以開齋。但係1.43倍主W畀人一種唔穩陣嘅感覺，呢個水位折換去亞洲盤係一球，咁嘅盤口喺啲強弱懸殊嘅對戰，往往會係就咁一球了事，甚至打和收工，係個跣人嘅最佳陷阱，所以博W又嫌冇肉食，玩讓球和又嫌風險高咗啲。

松本半場硬淨
既然係咁，倒不如玩吓個半場和好過。事關松本經過一年嘅日乙洗禮，表現硬淨過以前，而且開季8戰有7場半場唔使落後甚至領先，今日作客大阪前45分鐘頂得住唔奇，何況飛腳主場3戰對住FC橫濱、千葉同綠茵都係開和，今場再開多鋪有乜出奇。