利雲特Hea踢 巴塞大炒格

由於西甲、德甲已經大局已定，唔少人認為歐聯4強隊伍會喺今晚聯賽留力，但睇番佢哋喺8強前夕都上演過大屠殺，巴塞隆拿及皇家馬德里都喺8強次回合前夕西甲喪入5粒，拜仁就喺首回合前一仗整夠9球，大炒振聲威似乎先係潮流，今晚喺主場出擊嘅巴塞、皇馬同多蒙特都值得優先留意。

博堤亞高艾簡達拿首球
巴塞今晚就喺魯營主場迎戰利雲特，又再面對陣容不整嘅問題，「球王」美斯雖然喺周四練番波，但相信會留番對拜仁一仗先正式復出，今仗至多會踢一陣熱吓身，布斯基斯、馬斯真蘭奴、佩奧爾同後備門將賓度亦唔在陣，B隊龍門奧拉沙保仲奉命跟操以防萬一。但其實上兩場聯賽唔齊腳咪一樣大炒對手，皆因一眾後起之秀都好搏命，特別係射門欲極強嘅堤亞高艾簡達拿，不妨博佢開多次7.75倍「首名入球」。

對手利雲特由於已經夠晒分護級，所以自從佢哋喺歐霸盃出局後，冇晒目標隨即崩潰，繼作客不敵皇馬1:5之後，上仗主場都吞拉科魯尼亞4蛋，所以今仗巴塞「-2」都要捧2.18倍「讓球主勝」。

足球重心：巴塞隆拿、多蒙特
馬膽推介：10場