曼城狂鋒 摧毀熱剌

今日英超好戲連場，除咗有利物浦鬥車仔，仲有另一場大戰：熱刺喺主場迎戰曼城！無論計實力同狀態，依家排緊第2嘅曼城都贏晒熱刺，「藍月亮」客勝有2.25倍咁好分，梗係要力撐啦！

加里夫巴利復操或披甲
熱刺踏入4月後狀態回落，氣勢大減，近4場英超只得一勝，唔使小妹講，大家都知最主要原因，係一對快翼加里夫巴利同艾朗連儂受傷缺陣啦！有朋友成日同小妹講，冇咗「大聖爺」嘅熱刺，基本上同一支護級球隊冇分別，咁又係呀，你哋睇吓佢哋班後備，例如賀治比同施古臣咁，質素同巴利根本係天同地比！雖然尋晚有傳巴利仔已全面復操，今晚有機會披甲，但啱啱先好番，唔通仲旨意佢做救世主咩？

上季對賽迪斯高入4粒
另邊廂嘅曼城啱啱相反，呢班波嘅後備兵源勁到嚇死你，冇咗阿古路，都仲有泰維斯做救世主，最過癮係佢兩位老哥輪流爆發，難怪「藍月亮」近4戰全勝，當中更先後喺聯賽同足總盃擊敗曼聯同車路士呢兩支班霸啦！

講開曼城嘅鋒力，小妹不得不提迪斯高！雖然呢位波斯尼亞射手嘅風頭畀阿根廷孖寶搶晒，但其實佢上季喺白鹿徑曾經食過大四喜，堪稱「熱刺剋星」，今晚若然有乜冬瓜豆腐，迪斯高都可以後備搏殺，以曼城嘅火力，熱刺根本擋都擋唔住啦！可能有朋友擔心「藍月亮」啱啱先應付完周中英超快車，未必咁快回到氣，不過呢支豪門後備兵源雄厚，為咗保住個2哥位，點都會搏命贏埋呢場先再算嘅！

推介：曼城