車路士開餐搶食燒「鵝」

今晚英超有車路士喺主場鬥史雲斯，家陣勁有機會打入歐霸決賽嘅「藍戰士」氣勢大盛，主場聯賽已錄得5連勝，加埋今場由之前被指針對佢哋嘅卡頓保主吹賽事，相信呢位判官唔會敢再「行差踏錯」，天時地利搭埋人和，絕對可以「打殘」拎完聯賽盃就洩晒氣嘅「白天鵝」史雲斯，一於取1.9倍「讓主」！

保前4爭歐聯入場券
唔好以為車路士為咗爭歐霸盃返到聯賽就會腳軟，首先佢哋仲要努力搶分保住個前4位置，而且以佢哋嘅板櫈深度，絕對夠賓尼迪斯玩輪換，唔用專踢歐霸嘅費蘭度托利斯，都仲有極具級數嘅丹巴巴亞數胡，拉美利斯又可以代替林柏特，根本冇留力呢回事！睇番佢哋近11場主場賽事獲得9勝2和佳績，就知「藍戰士」家陣信心十足啦，加埋上年主吹車路士賽事時被指種族歧視嘅球證卡頓保，今場正式重臨史丹福橋球場，相信佢為免再被「釘牌」，唔會敢令「車仔」輸波嘅。

史雲斯Hea踢等抖暑
史雲斯今季的確畀咗唔少球迷驚喜，勇奪英聯盃冠軍更係為人津津樂道，點知佢哋捧盃後就學足上屆奪冠嘅利物浦咁Hea踢，決賽後嘅6場賽事居然只得1場贏波，擺明係冇嘢好爭「等收工」喎！雖然米捷近3場都有2球進帳，但條後防就唔多「給力」喇，近5戰有4場都失2粒，面對諾域治都落得咁嘅下場，更何況作客車路士先？既然佢哋拎完隻聯賽盃就當球季完咗，咪畀車路士炒一鑊，當送分畀對手囉！