榜尾美決累鬥累 博雷丁QPR和波攬炒

南華今年終重奪失落2年嘅聯賽冠軍，身為「擁南躉」嘅我當然係非常興奮，非常激動，直頭開心到要着住件波衫瞓覺！今日晏晝南華又會同死敵傑志喺足總盃4強次回合鬥過喇，相信又係一場火藥味濃嘅賽事，小妹當然唔會錯過啦！

每逢周末，小妹晏晝睇完本地波，夜晚就梗係睇外國波喇！今晚雷丁會喺主場鬥昆士柏流浪，呢兩支喺英超墊底嘅球隊上周一齊輸波，其中雷丁作客1:2不敵諾域治後，不勝走勢已經去到10場，所以佢哋今場同QPR邊隊輸波，就肯定降班喇！主隊門將麥卡菲上場面對利物浦表現出色，救咗唔少必入球守住不失，今場有佢把關，有力保不敗o架。

輸波一隊即降班
至於連輸5場嘅昆士柏流浪都唔好得幾多，上場喺自己地頭對住成個聯賽火力最弱嘅史篤城都輸，唔怪得領隊夏利列納都話護級成功機會好渺茫！小妹覺得兩隊波都係海軍鬥水兵，既然和有3.5倍，絕對可以一試o架！

推介：雷丁