射手爭位恒大去盡拆「車」

亞冠盃最後1輪分組賽今日繼續上演，FC廣州喺主場對全北汽車，1.8倍主勝要捧。雖然提早出線嘅恒大和波已經夠數肯定首名，但射手巴里奧斯要為前途而戰，否則入到16強隨時讓位冇得踢，熱捧恒大着數。

恒大上年分組賽主場試過輸1:3畀全北，心態上又未必肯放水喎。事實上，恒大前鋒梅里基、射手巴里奧斯同隊長鄭智，全部冇喺日前嘅中超「廣州打吡戰」打正選，睇得出今場停賽唔能夠喺場邊督師嘅教頭納比，好重視呢場波。

仲有呀，今季加盟嘅射手艾傑臣，因為冇註冊唔踢得分組賽，不過最近佢變身「艾傑神」瘋狂入波，假如巴里奧斯再唔踩油，淘汰賽再註冊球員名單時，隨時要樣衰讓位，話晒佢都曾經係巴拉圭國家隊頭號射手，邊會肯咁失威？恒大即使有後衞張琳芃停賽都有力贏波。

另一方面，全北日前喺韓職主場以1:1逼和浦項制鐵，隊長李東國又入波，中場伊連奴又可以克服傷患上陣，弊在中場朴赫浩要坐波監，最近全北對仁川聯、城南一和同浦和紅鑽都坐底失2球，防線明顯靠唔住！