曼城「大」破西布朗

曼城今晚喺英超主場對西布朗，肯定會留力踢星期六嗰場足總盃決賽，但咁唔代表佢哋會冇波入，特別係9成離隊嘅迪斯高難得打正選，上場佢又失機頻頻累球隊失分，搞到領隊文仙尼扯晒火落柯打要入波，1.48倍入球大抵玩！

藍月亮保亞軍照搏
日前曼城作客以0:0打和史雲斯，迪斯高後備入替竟然空門都唔入，大家知啦，佢喺曼城已經進入倒數日子，再搞啲咁嘅笑話出嚟，又點氹到多蒙特、祖雲達斯或者拿玻里肯出高薪簽佢呀？唔好忘記，今季迪斯高喺英超入12球，聯賽入球數字其實高過泰維斯同及阿古路o架！佢肯搏唔憂冇波入。

唔只咁呀，現時曼城只係領先車路士4分，再衰落去隨時聯賽第2位不保，到時領隊文仙尼想唔炒魷都幾難，所以日前贏唔到史雲斯佢發晒茅，仲話照戰情睇曼城應該贏5:0至啱，狂插球員唔識把握入球機會。講到咁扯火，相信曼城唔會喺主場再食白果，而且佢哋啲後備咁高質素，入波容乜易？何況曼城依家好齊腳，除咗因為左肩發現凝血塊入咗院嘅史葛冼佳亞，其餘個個都落得場，個陣不知幾完整。

西布朗快樂足球唔死守
對家西布朗唔憂降班，日前喺主場以2:3不敵韋根，睇得出佢哋踢緊快樂足球，唔會專登玩死守。雖然話西布朗有前鋒麥克科東尼停賽，不過以外借身份効力嘅盧卡古弗到漏，只要佢射得爆曼城，下季重返車路士爭正選嘅把握就更大。既然兩隊都有射手要入波證明自己，駁火格唔玩大佢就蝕底。

曼城半場7戰不失
‧曼城近11場主場有10勝1和。

‧曼城連續7場半場不失。

‧曼城今季有迪斯高、泰維斯同阿古路入球數字達雙位數。

‧西布朗近3次作客曼城至少淨輸2球。

信攤路博埋總入球4、5球
唔計日前對史雲斯互交白卷，今季曼城有6場波冇波入，跟手嗰場有5場開入球大，其中有4場開總入球4球或者5球，仲有1場誇張到開7+，所以信攤路嘅話今場入球大最抵玩。不過咁，假如各位嫌入球大得1.48倍，都可以要晒4.6倍4球同7.2倍5球，好分啲嘛！