巴甲內訌撐明尼路

朝有兩場南美自由盃16強次回合賽事上演，其中23 場明尼路主場對聖保羅就爆發「巴甲內訌」！主隊喺今屆自由盃幾乎所向無敵，8場賽事贏7場，唯一敗仗係喺分組賽作客0:2輸畀聖保羅，不過明尼路吸取教訓後，就喺16強首回合以2:1贏波報仇，咩信心都返晒嚟，加上佢哋兩員主將迪亞高泰達利同比拿度安尼斯雙雙復出，前者今屆賽事已經入咗4粒，係球隊嘅主要火力泉源，同朗拿甸奴拍住上入波冇難度，1.8倍主勝信得過！

至於另一場24 亦有巴甲球隊富明尼斯主場迎戰艾美歷克，主隊首回合以1:2落敗，佢哋賽前仲傳出壞消息，中場主將迪高因為未能通過藥檢，家陣起碼要停賽1個月，如果打唔甩罪名嘅話，仲分分鐘要停足2年添！況且富明尼斯近況亦唔算太好，喺州聯賽先後面對法林明高同保地花高兩支同級球隊都輸波，小妹實在唔睇好佢哋可以晉級，既然艾美歷克受讓，一於直取2.32倍「讓客」啦！