今晚西甲收爐戰，巴塞隆拿會喺魯營迎戰馬拉加。「地上最強」肩負贏波以100分過終點嘅重任，誓要同宿敵皇馬平分聯賽最高分紀錄，面對喺季尾作客不堪一擊嘅馬拉加，巴塞要大炒完美謝幕冇難度，1.5倍「讓主」咪走寶。

（now632台周日凌晨1:00直播）

巴塞日前被《點球點》爆料，會長羅素爾同體育總監蘇比沙列特就教頭維蘭路華嘅去留問題意見分歧，導致關係緊張，但相信對球員冇乜影響，事關佢哋喺歐聯畀拜仁恥辱性淘汰後，成班波知恥近乎勇，目前保持4連勝，更重要係「魯營威力」喺聯賽仍然生效，除咗和過皇馬，其餘17場贏晒。預計艾比度今場會出任正選左閘，艾迪安奴移至右路頂替入選國家隊嘅丹尼爾，防線仍然完整，加上有狀態大勇嘅阿歷斯山齊士同法比加斯合作數胡，入波易過借火。 

另邊廂嘅馬拉加，繼教頭比歷連尼落實離隊、艾斯高9成走人後，門將韋利卡巴尼路最近更公開搵「新老細」：「如果巴塞肯斟我，我梗係飯應啦！」核心球員搶住轉飯鑊，隨時影響士氣，最大鑊係馬拉加季尾作客腳軟問題嚴重，就連下游嘅CF格蘭納達都贏到佢哋，表現差成咁，今晚對巴塞想輸少粒都難！