阿甲殺到入大直路，仲有一絲希望爭奪秋季聯賽冠軍嘅拉魯斯，將會喺主場恭候貝格拉諾。拉魯斯主帥舒洛圖賽前發出「餘下4輪全勝」通牒，但考慮到佢哋近期火力跌Watt，今仗未必會贏得太輕鬆，寧博3.25倍「讓球和」。

（開賽時間：周一凌晨3:10）

睇番聯賽榜形勢，拉魯斯目前落後「一哥」紐維爾舊生4分，想後來居上唔係話冇機，不過要望人哋失分之餘，自己亦要做好本分。隨住球隊連續3場聯賽失分，上仗仲畀聖馬田聖祖安打破不敗金身，教練舒洛圖前日已經召開內部會議，喺更衣室白板寫上「餘下4場聯賽全勝」口號，試圖激勵手足士氣，今仗有埋中場主將迪亞高干沙利斯刑滿復出，照計點都秤先過貝格拉諾。

對家貝格拉諾今季已經超額完成，未來4場波攞多1分就將會歷史性獲得南球盃入場券，士氣無疑係好，但爭勝決心明顯唔及急住搶分嘅拉魯斯咁旺盛。況且貝格拉諾今季作客只係贏得1場咁大把，拉魯斯有能力反彈全取3分，考慮到主隊近3場波入得1球，呢場博拉魯斯小勝好路。