啱啱喺南美自由盃淘汰迪祖亞拿躋身4強嘅明尼路， 朝巴甲會返主場迎戰聖保羅。今次係佢哋喺2013年內第5次碰頭，明尼路有前世界足球先生朗拿甸奴等好手壓陣，仲要今年表現食住對手，1.95倍主勝自然係信心之選。

（廣東體育周一清晨5:30直播）

呢兩支球隊今屆自由盃同樣被編入C組，出線後又即刻喺16強對碰。4次交鋒入面明尼路取得3勝1負佳績，當中輸嗰場、即分組賽最後一戰更有留力之嫌，事關當時聖保羅要攞足3分先可以躋身淘汰賽，相反明尼路已提早出線，輸咗都冇所謂，但隨後16強對碰就「打真軍」，成功雙殺聖保羅晉級。距離上次交手唔夠一個月又見面，好難唔秤先明尼路喎！

況且明尼路有回勇嘅「細哨」派牌，射手祖奧實有大把「餐士」，加上新加盟嘅前阿仙奴防中基拔圖施華負責掃蕩，可謂攻守兼備。雖然中場比拿度安尼斯奧同中堅利華漢拔圖要為國効力，但聖保羅亦有中場謝臣被巴西徵召對英格蘭，另一主力甘素又要養傷，唔通信阿仙奴借將丹尼遜可以擔大旗咩？