「四眼哥」今日揀咗場巴甲同大家研究，就係今季巴甲開鑼以嚟「名氣與戰績不相稱」嘅華斯高對明尼路。明尼路家陣全副精神擺晒落南美自由盃，唔止搞到巴甲踢咗兩場都未開齋，今場對華斯高仲因為擔心朗拿甸奴同迪亞高泰達利過勞，決定畀佢兩位大帝休息，擺明讓車馬自由盃大過天，咁情況梗係捧有得受讓平半嘅華斯高啦！

無錯，華斯高今季表現都係名大於實，踢咗3輪係第一場主場贏波之外，兩場作客都香晒，但佢哋勝在士氣一直保持到，今場除咗後衞秘魯腳約斯馬約頓要踢太公波外，其餘主力都喺度，加上早前因藥檢肥佬停賽嘅中場卡路士阿爾拔圖刑滿復出，令華斯高陣容更完整。最緊要係華斯高會方啱啱公布咗，為改善球隊防守力，計劃用50萬美元增兵，班大哥唔想無碇企，今場仲唔加多兩錢肉緊同唔齊腳嘅明尼路死過咩！

明尼路家陣眼中只有自由盃，巴甲？球隊連將獲選為米納斯古拉斯州榮譽公民嘅主將「細哨」都可以收起，仲唔係疊埋心水踢晒自由盃先再追分？