俄國「土炮」砌低葡國巨星!今晚世界盃外圍賽歐洲區F組焦點大戰，有葡萄牙主場迎戰同組榜首嘅俄羅斯，雖然主隊陣容星光熠熠，但全部起用本土聯賽球員嘅俄羅斯勝在夠合拍兼防守穩健，踢少2場仍然以全勝姿態穩佔榜首，實力唔講得笑，一於力敲1.95倍「讓客」啦！

（中央5台周六凌晨3:45直播）

葡萄牙齋睇陣容的確係頂瓜瓜，C朗、拿尼等都係頂級聯賽巨星，但睇埋近績就唔多掂喇！佢哋近6戰得1勝，即使係喺世盃外對住以色列同北愛爾蘭呢啲實力平庸球隊都未能全取3分，歸根究柢係因為班球星個個嚟自唔同嘅聯賽，葡超、西甲、英超等7大聯賽都有「貢獻」，咁分散，返到國家隊自然踢到格格不入啦！ 

最慘係佢哋前線火力其實唔錯，近8戰有6場都至少入2粒，但條防線實在太得人驚，近4場就失咗9球，近8戰更只得對住「魚腩部隊」阿塞拜疆先可以保持清白，面對擅長打穩守突擊嘅俄羅斯，未必拎到咩着數喎！

至於俄羅斯雖然比大部分同組球隊踢少2場，但仍然以4場全勝兼零失球姿態穩居F組榜首，明顯已經同上年歐國盃分組賽出局嗰隊波完全唔同，今次領隊卡比路清一色起用本土聯賽球員，大家見慣見熟清楚隊友踢法，默契自然更好啦！佢哋火力唔算特別強，但勝在防守穩健，近7戰有5場冇失波，中場舒洛哥夫亦對防線投下信心一票：「就算要守足全場，我哋都會贏波！」葡萄牙想贏波爭榜首，真係難啲喇。

葡萄牙近6戰僅得1勝，其中得1場未有失波。

俄羅斯近8戰得5勝3和佳績，其中5場保不失。

俄羅斯近8戰有5次領先，而且換邊前未失過波。

雖然葡萄牙進攻方面頗為出色，不過俄羅斯憑住穩健防守，甚少喺換邊前失波，尤其喺今屆世盃外圍賽至今錄得零失球嘅全勝佳績，葡萄牙未必咁易偷到雞，反而佢哋後防經常出現失誤，更有利上半場經常領先嘅俄軍早早開紀錄，5倍半場客勝諗得過。