世盃歐洲區外圍賽戰火重燃，當中B組榜首意大利今晚作客「三哥」捷克。捷克為保出年去巴西踢決賽周嘅機會，今仗勢必主動出擊，之但係對住意大利，你話想食就實食到o架咩？分分鐘畀意軍打反擊得手，2.06倍客勝信得過。

（開賽時間：周六凌晨2:45）

形勢上，捷克落後第2位嘅保加利亞2分但少踢1場，但之後佢哋仲要作客保加利亞同丹麥，所以門神施治都話今場只有全取3分，先可以保住次名出線嘅主動權。不過自從前鋒真高拿、巴路士退隊後，捷克就缺乏可靠嘅「士哥拿」，中場仲係靠年華老去嘅路斯基派牌，咁嘅陣容想主動出擊，畀意軍睇住嚟食都似。翻查紀錄，捷克喺主場對丹麥吞咗3隻蛋，對保加利亞又悶和0:0，連主場威力都冇埋，憑咩砌低藍軍。

相反意大利除咗喺分組賽首戰作客打和保加利亞2:2外，跟住4戰輕鬆取勝。今場仲有AC孖寶巴洛迪利同艾沙拉維攻堅，加上中場派路、蒙杜利禾穿針引線，贏波真係冇難度。