瑞士嘅行軍布陣，本來就好似佢哋嘅鐘錶一樣咁精密，但係冇咗教練喺場邊督軍，即使對住魚腩部隊都會縮窒，今晚喺世界盃歐洲區外圍賽E組，主場對住塞浦路斯未必話炒就炒。

塞浦路斯上輪主場同瑞士踢成0:0，呢個戰果拍得住3年前4:4逼和葡萄牙場波咁震撼。其實，瑞士踢得差主要同教練希斯菲特被禁賽有關，雖然佢一直畀人好穩重嘅感覺，但由於喺主場對挪威一戰向球證豎中指，結果要坐兩場波監，都算老貓燒鬚。 

千祈咪以為塞浦路斯係公認嘅魚腩部隊，即使希斯菲特坐波監都無傷大雅，瑞士上仗作客就陷於苦戰，唔止踢起嚟老鼠拉龜，而且仲幾乎畀對手幾次突擊搞掂。佢哋呢場返到自己地頭當然要打醒十二分精神，不過始終冇希斯菲特喺場邊睇實點都差啲，如果塞浦路斯食過翻尋味再用悶招對付瑞士，主隊急躁起上嚟亂晒陣腳，隨時又會意外失分。

53支參賽隊伍分9組作賽，9支小組首名出線決賽周；8支成績最好次名球隊抽籤踢附加賽決出最後4個出線席位。同分先計得失球，然後再計算對賽。