克羅地亞今晚喺瑞士日內瓦中立場同葡萄牙踢熱身賽，2.1倍入球大最抵玩。雖然克羅地亞剛啱喺世盃外圍賽輸波，但佢哋啲前鋒多到用唔晒，爭位踢唔似會繼續食白果。對手C朗為咗打破國際賽入球荒，當然會進入「喪射Mode」，咁搞法，好易開入球騷。

（開賽時間：周二凌晨1:30） 

強陣出擊嘅克羅地亞以0:1不敵篤定出局嘅蘇格蘭，的確估佢唔到。不過咁，除咗對蘇格蘭打正選嘅拜仁慕尼黑射手文迪蘇傑同禾夫斯堡前鋒奧歷，「格仔軍」仲有愛華頓前鋒謝拉域同薩克達箭頭伊度亞度達施華等住打正選，唔好忘記，輸畀蘇格蘭之前克羅地亞連續5場至少入兩球，衰完肯定想省招牌。

另邊廂嘅葡萄牙，剛啱喺世盃外以1:0險勝俄羅斯，但由於皇馬中堅比比冇歸隊，防線絕對唔算穩陣，何況葡萄牙同克羅地亞一樣，攻擊球員多到爆，比錫達斯中鋒曉高艾美達同曼聯翼鋒拿尼都要做後備，既然雙方球員等緊放暑假，熱身賽當然唔會守得特別肉緊，有利開入球大。

仲有呀，C朗喺對俄羅斯嘅比賽，為咗打破個人連續273日國際賽入球荒，選擇向對方龍門瘋狂喪射，淨係佢1個已經有7次埋門，睇得出佢好想令批評者收口。再講，最近C朗又扭計要皇馬加人工，據講仲獅子開大口要求35萬鎊全球最高周薪，臨放假前騷吓「哥利」，傾加人工都大聲啲啦，2.1倍入球大玩得過。