U21歐國盃4強誕生，西班牙、意大利及荷蘭大熱出線，反觀挪威能夠力壓英格蘭同東道主以色列就冇乜人估到。事實上，挪威球員普遍技術粗糙，僅以身形及體能搭夠，今晚遇到「技術流」嘅西班牙，睇怕都係凶多吉少，尤其係一班「小狂牛」好似曼聯門將迪基亞、馬拉加箭頭艾斯高等，個個都喺所屬球會獨當一面，如無意外應可順利打入決賽。

另一場4強戰實力則接近得多，意大利攻守平衡，3場分組賽入6球僅失1球，當中頭兩輪比賽均零封對手，完全演活意式防守穩健嘅足球風格。至於由中場韋拿杜姆、盧克迪莊同賀爾臣組成進攻三叉戟嘅荷蘭，頭兩輪入8粒，盡顯進攻足球之威力。今晚呢場「矛盾大戰」，肯定好睇過戲！

去年西班牙同意大利齊闖歐國盃決賽，唔知呢兩隊小國腳今勻又會否狹路相逢，重演大師兄對壘戲碼呢？大家不妨拭目以待！