意大利兩大前鋒打柴？今晚洲際國家盃A組會上演中北美洲代表墨西哥，惡鬥歐國盃亞軍意大利嘅賽事，雖然論球員質素以「藍衫軍」秤先，但巴洛迪利同艾沙拉維兩大射手都極有可能避戰，令墨西哥分分鐘有機可乘，受讓平半嘅下盤有1.96倍，絕對值捧！

（無綫翡翠台、無綫明珠台及高清翡翠台、中央５台周一凌晨3:00直播）

意大利賽前傳出壞消息，除咗主力射手艾沙拉維因傷缺操外，家陣連鋒線靈魂人物巴洛迪利都傳出喺上周五嘅操練拉傷腿筋，要提早停止練習，雖然隊醫話「巴神」冇乜大礙，但如果呢對AC米蘭嘅鋒線拍檔齊齊打柴，對於「藍衫軍」嘅火力影響肯定極大！尤其巴洛迪利回歸意甲後踢13場球會賽事入足12球，而且盛傳會成為替補嘅基拿甸奴年紀已經唔細唔多可靠，中場老將派路同馬治斯奧喺歐聯嘅演出又未夠說服力，未必可以打低墨西哥。

墨西哥嘅近況雖然非常麻麻，最近9場賽事和足8場，但同時間佢哋嘅不敗走勢已經去到13場，近6戰更有5場未有失球，即使入波多唔多，防線亦都有望頂得住失去主力射手嘅意大利o架！

講真，有「大賽專家」之稱嘅墨西哥，連續5屆世界盃都殺到入16強，喺美洲金盃更係連續2年奪冠，即使對住意大利都唔會輕易投降，唔好忘記佢哋仲有曼聯射手查維亞靴南迪斯壓陣，今場絕對有本錢頂住唔輸搶到分。

雙方近11次交手，墨西哥僅得1勝。

墨西哥近9戰得1勝8和，其中7場開出入球細。

意大利近6戰亦有3場開細。

洲際盃A組