世青盃今晚輪到東道主土耳其U20登場，身處C組嘅佢哋喺特立布宗迎戰實力有限嘅薩爾瓦多U20，憑住較佳質素，加上超強氣勢地獄主場，要贏2粒或以上話咁易，1.8倍「讓主」值得捧場。

（TVB網絡電視01頻道、now801台周日凌晨2:00直播）

土耳其地獄主場氣勢聞名全球，今次更係歷來首度有國際性足球大賽喺度舉行，想班Fans唔「發癲」都幾難！雖然話佢哋缺乏超級球星，但都仲有唔少喺本土同德甲頂級球會効力，諸如利華古遜前鋒巴基斯、漢堡中場卡漢奧奴同法蘭克福門將奧薩亞等，要攞到出線資格應該難度唔大。

反觀薩爾瓦多U20，今次只係歷來首度殺入世青盃決賽周，國內青訓發展一直成效麻麻，即使佢哋喺U20中北美洲國家盃拎到季軍，力奇相信始終都係同對手偏弱有關，唔多信得過！再者，睇番佢哋家陣陣容，最巴閉都只係効力丹麥邦比前鋒馬干奧利蘭拿同蘇黎世守將巴姆加特拿等，部分成員更只係嚟自美國大學球會，今鋪睇怕都係吸取經驗居多，輸少當贏先係目標。