世青盃C組第二輪賽事，東道主土耳其今日迎擊首戰大意失分嘅哥倫比亞。哥倫比亞要全取3分先可保住出線主動權，相信佢哋會大踢進攻足球，但土耳其鋒力都唔差，1.75倍「入球大」咪走寶。

（TVB網絡電視01頻道、now801台周三凌晨2:00直播）

哥倫比亞對上3次參加世青盃都未試過喺分組賽出局，今屆以U20南美國家盃冠軍身份參戰，點知首戰就和咗澳洲，今場再贏唔到，隨時陷於出局邊緣，所以今晚務必大舉進攻。哥倫比亞一對射手祖安昆特路同積漢哥度巴喺U20南美國家盃合共轟入9球，火力有保證，問題係佢哋上仗居然畀得16歲嘅澳洲中場丹尼爾達施華偷雞得手，反映班波防線唔係咁穩陣。

至於首仗旗開得勝嘅土耳其，依家士氣如虹，一班年輕球員梗係想再次喺鄉親父老面前威吓，又點會踢得消極。值得留意嘅係中場「孖寶」施克沙軒同沙利烏簡，佢哋上場互交助攻兼入波，默契一流，今晚對住全軍出擊嘅哥倫比亞，分分鐘又有斬獲。

世青盃C組

現為分組賽階段，24隊分6組，每組4隊進行單循環比賽，每組首、次名，以及4支最佳小組第3名將進身16強。