世青盃話咁快嚟到16強階段，其中西班牙U20今晚會對住墨西哥U20，「小狂牛」2.16倍「讓主」係筆者是日精選。「大狂牛」尋日喺洲際盃雖不敵巴西，未能成就「金滿貫」偉業，但「小狂牛」喺世青盃勢如破竹，要炒起掹車邊過關兼且唔齊腳嘅墨西哥，可謂易過借火。

（TVB網絡電視02頻道、now810台周二晚11:00直播）

今屆世青盃分組賽唯一全勝晉級嘅「小狂牛」，喺最後一輪面對法國，領隊洛佩特吉已專登為今場波鋪路，收起查維亞文基路、伊斯列佩亞圖一對「孭簿」後防，中場核心蘇索同荷西甘賓拿亦各踢半場，完全避免球員停賽，或者頻密賽程導致體力不繼嘅問題。

被譽為巴塞天才嘅迪路菲奧，上場全程後備儲足力，至今交出兩個入球1助攻不俗成績。皇馬小將謝斯洛迪古斯更係3場分組賽都有波入，目前攻入4球，平均每54.75分鐘就有斬獲，極具效率，有呢個「皇巴配」進攻組合，要讓一球絕冇問題啦！況且今場喺伊斯坦布爾嘅土耳其電訊球場舉行，正正係「小狂牛」過往3場分組賽嘅比賽地點，場地適應比起「初嚟埗到」嘅墨西哥，就連地利都有埋。

至於墨西哥喺頭兩場分組賽輸波後，最後一輪大炒馬里掹車邊以最佳第3名出線，但如果唔係馬里門將低級犯錯，無端端踢個波畀墨西哥，搞到開波2分鐘落後被迫焗攻，防線穿窿，墨西哥係咪能夠清風送爽炒4:1，絕對係疑問。再者，查雲奴首輪膝傷退下火線後，依家仲未好番，艾斯高保沙亦累積兩面黃牌今場停賽，冇咗呢兩位中場樞紐擔任攻守轉換角色，試問邊夠「小狂牛」砌？

世青盃：現為16強階段，如法定時間90分鐘內打和，將加時30分鐘，未分勝負則互射12碼決勝。

歐霸盃：採主客兩回合制，今輪為第1圈外圍賽。如兩回合計打和，將計算作客入球優惠，未分勝負將於次回合法定時間後加時30分鐘，加時階段仍計算作客入球優惠，再和則互射12碼決勝。

自由盃：採主客兩回合制，今輪為4強首回合。如兩回合計打和，將計算作客入球優惠，未分勝負將於次回合法定時間後互射12碼決勝。