南美自由盃4強首回合大戰 朝上演，由紐維爾舊生主場對明尼路。兩隊近排狀態都係麻麻，不過紐維爾舊生剛啱失落阿甲超級冠軍，班主力骨幹又搏到殘，情況唔多樂觀；相反，明尼路好重視自由盃，朗拿甸奴例牌踢正選，祖奧又玩完洲際盃歸隊，受讓平半，1.87倍下盤抵捧！

（有線61及201、廣東體育周四早上8:50直播）

今季紐維爾舊生後備陣容唔多掂，近期兼顧阿甲同自由盃即刻冧晒檔，結果喺阿甲超級冠軍大戰以0:1輸畀沙士菲衰收尾，真係喊得一句句。仲有呀，紐維爾中場麥斯洛迪古斯同後衞軒斯年紀唔細，早幾日先搏足全場，肯定會影響今場表現，想話靠佢哋食胡，真係蛇到死。

明尼路自從喺月中巴甲作客以0:1不敵山度士後，已經有超過半個月冇正式比賽，正好畀前線靈魂人物朗拿甸奴叉足電博反彈。最重要嘅係，射手祖奧同中場班納特安尼斯奧喺洲際盃同樣有好表現，歸隊可以大幅度提升明尼路士氣，就算有中堅利華漢拔圖停賽都唔怕。