另一場世青盃4強大戰由伊拉克挑戰烏拉圭，伊拉克有前鋒阿布度拉謙刑滿復出，烏拉圭亦有射手尼高拉斯盧比斯壓陣，睇牌面雙方攻力相當。不過「烏圭」仲有Plan B中鋒阿雲拿迪候命，加上防守又比伊拉克好，一於撐佢哋開1.74倍客勝。

（無綫翡翠台、明珠台、高清翡翠台、TVB網絡電視01頻道、now801台及中央5台周四凌晨2:00直播）

嚟到4強階段，勝負關鍵往往睇邊隊犯錯少啲就可以晉級，烏拉圭自首戰以0:1輸畀克羅地亞後取得4連勝，當中只失過1球，上場更令大熱門西班牙「冇啖好食」，就知佢哋防守信得過。況且「烏圭」又有後備殺手阿雲拿迪候命變陣，上場就係靠佢「頂走」西班牙。睇番4強各隊統計，烏拉圭成隊波一共被人Foul咗93次，遠較其餘3隊多，阿雲拿迪今場可能又靠死球「搵到食」。

伊拉克今屆5場賽事只得1場保持清白身，上仗踢到加時下半場末段入波領先南韓3:2，點知得番幾分鐘完場都守唔住，搞到要射12碼，就知隊波防守唔穩陣。計落佢哋連續2場比賽踢足120分鐘，成班球員隨時喺下半場就腳軟，咁點頂得住烏拉圭呀！