女足歐國盃今晚開戰，東道主瑞典會喺哥登堡迎擊丹麥，照牌面計，當然係曾經8次亮相歐國盃嘅瑞典秤先，不過佢哋大戰前夕先有助教劈炮，就連最好波嗰位中場茜嘉都話有傷未必出得，寧願博鬥心十足嘅丹麥，要2.42倍「讓球客勝」。

（now633及635台周四凌晨2:30直播）

瑞典女足5日前爆出將帥不和，助教積及臣突然劈炮唔撈，領隊皮婭最近又將中場費絲查改造成後衞，呢位經驗老到嘅悍將賽前都有唔少怨言，加上韌帶傷未好番嘅36歲馬模翼鋒史祖蘭又爆冷入選今次大軍，據聞唔少國腳都唔多妥皮婭嘅決定，陣營氣氛好麻麻。

丹麥只有5位國腳出戰過世界盃或歐國盃，大賽經驗係就係不足，但領隊漢拿慕拿勝在戰術夠進取，賽前講到明會派遣娜迪姆、卓絲嘉特同喺42場國際賽攻入21球嘅夏達三箭頭上陣，擺到明想同瑞典鬥攻。況且中場維積對瑞典傳媒認為丹麥係陪跑分子嘅言論勁不滿，成班國腳都希望靠今場波落瑞典面，鬥心十足梗係撐得過啦！