日職進攻之王歸位！川崎前鋒今晚喺主場對浦和紅鑽，追入球大最着數！最近川崎已經回復昔日喪攻本能，入球騷開到停唔到，加上射手大久保嘉人話明要成為日職「100球先生」，有佢搏命入波，對住紅鑽唔憂冇波入！（有線64及203周六晚6:00直播）

大久保嘉人喺上星期對鹿島鹿角梅開二度後，個人已經累積99個日職入球，雖然周中對廣島三箭佢冇波入，不過大久保已講到明唔會失望，而且佢話喺等等力競技場躋身日職「100球先生」俱樂部，更加有意思喎。大家知啦，最近川崎已連續5場開大，連平日唔多直接攻門嘅隊長中村憲剛都連續3場入波，唔追入球大點得？

另一方面，浦和係今季日職入波最多球隊，開季15場聯賽入32球，最難得係，射手興梠慎三好番冇耐，王牌原口元氣因為紀律問題被內部停賽後，已經分別重新獲得重用，周中浦和喺主場以2:2打和FC東京，佢兩個更加分別入波，由於浦和要追分爭聯賽冠軍，相信作客都唔會踢得太保守，肯攻嘅話好容易同川崎合演入球騷。