今晚歐聯第2圈外圍賽次回合，蘇超班霸些路迪主場迎戰北愛爾蘭「一哥」基福維利，讓兩球照捧1.72倍「讓主」。些路迪首回合前往北愛作客，最終毫無懸念輕取對手3:0，就連新援小將亦喺日前熱身賽大爆發，全隊狀態弗爆撳唔住，再次大勝易過借火。

　　(開賽時間：周三凌晨2:45)

　　基福維利射手倒戈冇貨交

　　些路迪早幾日同賓福特拍跳，雖然有粉絲掟完煙霧彈，又落場同保安玩「麻鷹捉雞仔」，賽後更有過百名球迷衝入草地慶祝，搞到警察最終出手拉人，不過教頭連儂則力挺擁躉：「係有少少過火，煙霧彈亦最好唔好啦，不過呢種嘉年華氣氛好正，希望返到主場繼續有!」班「些躉」收到柯打，今晚聲勢肯定贏晒。

　　再者連儂喺呢場以副選搭新援試陣，除咗射手艾美度巴爾迪同中堅莫耶高洛兩件新兵表現對辦，廿歲出頭嘅卡林麥基哥更係光芒四射，今晚配合埋森馬拉斯同史杜基斯等主力壓陣，喺自己地頭再炒對手唔難。另方面，基福維利射手迪亞梅迪繼續倒戈上陣，但佢喺首回合後備落場根本冇貨交，難以對舊主造成威脅，大敗難以避免。

　　首回合：些勝3:0