不少球迷都期望拜仁喺新帥哥迪奧拿帶領下，可以突破上季「三冠王」嘅成績。點知佢哋喺第一擊嘅德超盃就輸畀多蒙特，難怪令擁躉大失所望。今晚佢哋喺奧迪盃主場對住近況極差嘅聖保羅，仲唔大勝一場氹番「米飯班主」咩，讓2球照撐1.87倍「讓球主勝」。

　　(有線61、64、201、203及廣東體育周四凌晨2:30直播)

　　聖保羅法比安奴冇隨隊

　　論實力，拜仁明顯喺聖保羅之上，預計中堅丹迪同門將紐亞，會分別取代上場表現不穩嘅守將雲拜頓同門將史達基，重返正選陣容。哥帥上仗對住失準嘅「契仔」中場堤亞高艾簡達拿都照鬧冇情講，其他球員實打醒十二分精神比賽。咪忘記拜仁今季人腳鼎盛，為正選位置又好，要氹番球迷都好，落場球員肯定搏盡。而且上場輸波後，哥帥應會針對球隊弱點對症下藥，今次理應唔會再失威。

　　對手聖保羅近況可以話慘不忍睹，佢哋連續11場未贏過，今次球隊遠赴德國比賽，長途跋涉下難免影響球員狀態，加上射手路爾斯法比安奴、中場丹尼遜、守將盧斯奧等6人又唔會隨隊出征，點頂得住一心要重振聲威嘅拜仁。