弗爆三叉戟 Vs 剋星魔獸

　　一連兩日嘅酋長盃今晚煞科，主人家阿仙奴會喺壓軸戰恭候加拉塔沙雷，大家都知呢項賽事係「入波多分數多」，鼓勵雙方球員踴躍埋門，相信喺季前熱身賽喪入波嘅「兵工廠」實唔會令球迷失望，預期會同擁有史奈達及「兵工廠剋星」杜奧巴等攻擊好手壓陣嘅加拉塔沙雷做「大」騷娛賓，一於撐入球大。(now621台周日晚11:20直播)

　　阿仙奴喺亞洲之行4戰狂入19球，以基奧特、普多斯基同禾確特合組嘅三叉戟總共包辦10個「士哥」，就算話對手只係印尼同紅鑽等呢啲實力較次嘅球隊，但連場勝仗肯定能夠打起班球員嘅自信。

　　加拉塔沙雷1:0小勝波圖

　　不過咁，由於隊長華美倫仲養緊傷，哥斯尼亦都喺日本之行扭傷右腳足踝，英國《每日郵報》指阿仙奴趕住斟史雲斯守將艾殊利威廉斯解困，領隊雲格今晚好可能又要搵小將恩格斯美基爾擔正，甚至將沙格拿移去中堅位置，隨時畀加拉塔沙雷有機可乘。

　　加拉塔沙雷今戰有伊保爾倒戈，但焦點始終係杜奧巴同史奈達呢對攻擊孖寶身上，當中「魔獸」昔日効力車路士8年間，總共喺阿仙奴身上攞到13個「士哥」，堪稱「兵工廠剋星」，加埋尼亞拿同咸美艾天托普雙翼齊飛，夠晒本錢數胡，佢哋尋晚喺酋長盃鬥波圖就大舉進攻，雖然只係憑防中菲臘比美路射入12碼以1:0小勝，但睇得出呢支土超班霸狀態唔錯，雙方鋒線都咁猛火，睇怕個大都走唔甩!

　　酋長盃賽制

　　每隊各踢2場，贏波得3分，和得1分，負則得0分，每入1球將額外獲得1分，總得分最高球隊將贏出賽事。若最後出現同分，將以得失球差決定排名;若得失球差亦相同，則以射門命中目標次數定名次。