哥帥省招牌 起清列頓底細

　　拜仁慕尼黑三料冠軍衞冕路今晚展開!首個考驗雖然只係地區聯賽隊伍列頓，但係拜仁新季已經失落咗德超盃，新帥哥迪奧拿嘅古靈精怪排陣又備受質疑，呢位少帥有必要做番齣好戲省招牌，今晚喺德國盃首圈造訪「二打六」列頓擺明係大炒格，一於捧2.2倍「客其他」!

　　(無線翡翠台周二凌晨2:30直播)

　　德超盃2:4輸畀多蒙特，跟手雖然捧走奧迪盃，但拜仁嘅「無鋒陣」戰術體系好睇唔好食，對曼城場波都要靠被打入冷宮嘅「真前鋒」文迪蘇傑打救贏波，適逢德甲今個周末就殺到，新帥哥迪奧拿點都要喺開咧前贏番鑊勁嘅攞彩，打番起班球星嘅信心。

　　當日德盃首圈秩序抽完籤後，隊長拿姆同體育總監森馬即刻查地圖搵搵列頓喺邊，證明佢哋真係唔知呢班波咩料，不過拿姆前日受訪嗰陣，居然講得出列頓係地區聯賽隊伍，並且喺03至04球季德盃首圈事輸畀1860慕尼黑1:5，證明拜仁上下已經做足晒功課，起清列頓個底，咁認真，今晚仲邊有得甩拖呀?

　　「列頓香川真司」未夠班

　　事實上，目前喺德國第4級聯賽角逐嘅列頓，平時最叻都係得400名球迷左右入場，但由於拜仁到訪，令會方收到1.5萬張買飛申請表，加上球場趕唔切裝番個合規格嘅泛光燈，所以列頓焗住移師去距離球會60公里、位於奧斯維貝克嘅奧斯拿迪球場作賽，變相冇咗主場之利!

　　講真，列頓嘅戰鬥力同拜仁爭幾條街，雖然有件「列頓香川真司」、23歲嘅日本中場廣岡太貴助陣，但出身大阪體育大學、老竇係前飛腳球員廣岡重信嘅佢，兩年前至離鄉別井去德國搵機會，响日本都冇球隊收留，又點會係正貨吖!最慘係全隊最好波嗰件守將班歷基觸傷腳踭舊患缺陣，冇咗呢位曾經為不來梅出戰過歐聯嘅定海神針鎮守後防，即使已經復操嘅馬里奧葛斯未出得，拜仁都夠晒本錢上演一場大屠殺!

　　賽制

　　德國盃及英聯盃均為第1圈階段，若法定時間內打和就加時30分鐘，未分勝負則互射12碼決勝。