葛斯复操强阵打残慕逊加柏

　　新一季德甲今晚开咧喇!开锣战由上季「三冠王」拜仁慕尼黑主场迎战慕逊加柏。今季改由哥迪奥拿领军嘅拜仁依家仲融合紧，不过佢哋实力超班，新兵马里奥葛斯又已经复操咗成个礼拜，今场有望后备落场骚「哥利」。慕逊加柏喺德国盃就连丙组仔都赢唔到，拜仁让2球1.8倍「让主」照捧可也!

　　(有线61及201、中央5台周六凌晨2:30直播)

　　哥迪奥拿上任拜仁后大改革，虽然备受质疑，但佢哋除咗喺德超盃输畀多蒙特外，其馀热身赛都赢晒，当中仲包括巴塞隆拿同曼城呢啲强劲对手。

　　洛宾卖口乖同哥帅好倾

　　本周初喺德国盃大炒列顿，踢正前锋嘅汤马士梅拿更连中三元，似乎佢已经逐渐适应呢个新位置，搞到上季踢到晓飞嘅文迪苏杰都要做后备!睇嚟哥帅嘅策略係，拜仁一旦攻唔入，就用文迪苏杰高空轰炸，难怪连高层路明尼加都话明，一定唔会拎「文仔」嚟交换多蒙特嘅罗拔利云度夫斯基，始终有多啲进攻瓣数，先係入波保证嘛!

　　慕逊未夹熟输畀丙组仔

　　洛宾日前受访就话佢同哥帅好好倾，又话唔介意安排佢踢咩位，咁识做，今晚必定继续得到重用。而且拜仁今季仲加多个「德国美斯」马里奥葛斯，佢已经伤愈复操，话晒呢场係哥帅首场德甲，班球员点会唔搏命帮老细响头炮呀?

　　慕逊加柏教练法夫尔今夏签入拉菲尔基达奴同麦斯古斯两位进攻能手，本来牌面唔差，弊在融合得麻麻哋，德国盃首圈对住德丙嘅达斯泰特连波都入唔到，互射12码仲输埋出局。虽然继续留队嘅门将达史特根係有料之人，但对住拜仁就算有三头六臂都难救啦!

　　顶占笋盘：拜仁(让球主胜)

　　乜都玩锦囊

　　拜仁大炒格3.5球照捧大

　　今季拜仁改由哥迪奥拿执教后，头炮德超盃已经失手，哥帅係聪明人，都知道开咧战唔赢番铺劲，好难平息民怨，以拜仁嘅超强火力，试问又有几多队顶得住?就算话今场入球大嘅中位数升到3.5球，1.85倍入球大睇怕都冇乜走鸡。

　　Data King：拜仁主场10连胜

　　拜仁近6次主场对慕逊加柏取得4胜1和1负。

　　拜仁主场连赢10场。

　　拜仁连续3次主场对慕逊加柏开「入球细」。