罗拔仔4次交手o赵6粒

　　寻晚德甲开锣战由拜仁慕尼黑揭开战幔，今晚就轮到另一支争标分子多蒙特登场。「蜜蜂兵团」已经喺德超盃剃拜仁眼眉，证明放走马里奥葛斯一样冇问题，况且罗拔利云度夫斯基出名係「奥格斯堡剋星」，「罗拔仔」转会唔成谷埋成肚火，今晚仲唔搵奥格斯堡出气咩，2.2倍「让球客胜」捧得过!(有线61及201周六晚9:30直播)

　　多蒙特练波4千粉丝捧场

　　呢头放葛斯，转头「罗拔仔」又因为转会拜仁唔成闹爆高层，唔少球迷都担心多蒙特会冧档。之不过从「蜜蜂兵团」以4:2勇挫拜仁捧走德超盃嘅表现嚟睇，球迷嘅忧虑可以一扫而空。强调只係唔妥高层，但同班队友夹得好Happy嘅「罗拔仔」，喺周中嘅德盃踢得鬼咁搏命，末段仲埋斋协助球队3球大炒威廉港，证明佢唔係得个讲字，呢啲咪就係专业!「罗拔仔」过去4次斗奥格斯堡足足入咗6球，摆到明恰死对手，今晚又再数胡有乜出奇?

　　多蒙特喺德国时间礼拜二进行为时75分钟嘅公开操练，吸引咗近4,000名球迷到场，队长晓姆斯有求必应勐咁帮球迷签名，纽尼沙轩受访时又大讚因足踝受伤仲未落得场嘅新兵米希达利恩好波，备战情况睇落几轻鬆喎!无他嘅，多蒙特上季联赛两斗奥格斯堡分别赢3:1、4:2，历来喺德甲亦未输过畀佢哋，胸有成竹好正路。

　　奥格斯堡伤兵成箩

　　主队奥格斯堡上季惊险脱离降班漩涡，体育总监路达都唔敢车大炮，坦言新季目标就係要护级，不过亨格比利担心佢老人家个愿望未必可以达成，毕竟球队今夏最重要嘅收购，只係从特拉布宗罗致哈利艾天托普，呢位土耳其射手近两年喺土超入得13球，回晒塘喇喎!仲有，中场费舒、华拿、左翼衞马素迪庄同门将曼宁加全部倦勤，天残地缺点顶得住多蒙特呀?

　　多蒙特热身赛劲入波

　　连同季前热身赛及盃赛，多蒙特近8场攻入24球。

　　双方近4次对垒，多蒙特射手罗拔利云度夫斯基攻入6球。

　　多蒙特上季联赛作客开大比率高达71%。

　　蜜蜂兵上晒力「大」开杀戒

　　多蒙特进攻有几劲a唔使多讲，最紧要係球员状态调整得好，季前热身赛连场大捷，德国超级盃更攻到拜仁有气冇碇抖。再者罗拔利云度夫斯基当正奥格斯堡係「私房菜」，多蒙特近4次对碰攻入11球，呢隻「波兰蜜蜂」包办其中6球，今晚继续开餐，吼实1.7倍入球大。