格雷特霍夫再奏「凯」歌

　　今晚德乙有场独脚重头戏，由开季同样两战全胜嘅格雷特霍夫及凯沙罗顿正面交锋。话就话凯沙罗顿有当Fit射手西蒙祖拿复出，不过佢隻脚趾啱啱先好番，加上前中后都有主力缺阵，作客想攞着数唔係咁容易。相反，格雷特霍夫锋力强劲，主场让平半，一于捧2.04倍上盘。

　　(开赛时间：周二凌晨2:15)

　　凯沙三线都有主力打柴

　　凯沙罗顿开季两战赢晒，功臣肯定非两场波攻入3球嘅西蒙祖拿莫属，呢位季前以30万欧元由奥斯纳贝克来投嘅射手，因为整伤脚趾缺席上周场德盃赛事，虽然赛前有消息指出，呢位德国射手今仗可以扎住上，但会唔会影响表现仲係未知数。

　　格雷3大锋将开晒斋

　　唯一可以肯定嘅，就係凯沙罗顿阵容唔太完整，前锋兼队长宾查古同西班牙后衞托利庄倦勤，中场阿历山大宁治又因为获芬兰国家队徵召而缺阵，前中后各有一件主将唔出得，战斗力定必大受影响。

　　反观格雷特霍夫除咗中场史柏夫，其馀主力都可以披甲，最重要係阵中锋将好似迪祖迪积、阿斯美同苏卡奴都开晒斋，攻击力强劲分布点又够广，唔似得凯沙罗顿嘅西蒙祖拿咁树大招风。

　　仲有呀，连同两场德乙同上周场德盃在内，格雷特霍夫3战全胜兼1球不失，攻守两瓣都咁掂，上盘梗係信得过啦!