英伦世仇打足百几年

　　国际友谊赛唔讲友谊!今晚英格兰温布莱主场对苏格兰嘅「英国内战」，源于历史背景，早就有个「亲密敌人」嘅称呼，虽然大家关係密切，但敌对情绪高涨，赛前两军名宿都出嚟拨火，真係恩怨情仇一朝了。「三狮兵团」为咗赢波，领队鹤臣据闻将会派曼联「雪柜兵」朗尼担正，要知道「魔童」之前踢亲国家队都着晒火，今仗打争气波仲点会留手?一于捧1.95倍「让主」啦!(now621台周四凌晨3:00直播)

　　咪以为英、苏两军依家唔係世界最顶级球队，今场热身赛就唔重要，查实两军史上第一次碰头出现喺1872年，呢场友赛一直被视为国际足球历史上首场国际赛，意义重大。之后两班波每年都会交手，直到14年前先结束，想当年经典对赛唔少，依家仲有英苏球圈中人倡议复办对抗赛添!

　　「魔童」踢国家队多波入

　　虽然话苏格兰近年国际赛战绩低落，但英格兰要砌低呢位「亲密敌人」都唔可以大意，好彩「三狮兵团」领队鹤臣为应付嚟紧嘅世界盃外围赛关键战，早就决心精锐尽出，全力练兵。近排同曼联闹到好僵、一直称伤只喺季前热身赛踢过一场嘅朗尼，周一嚟到英军大本营训练后，鹤臣见佢操完一课，就话佢状态OK，伤势无大碍。

　　苏格兰三线都唔齐脚

　　係真係假都好，鹤臣起用朗尼却係毫无疑问。事实上，「魔童」近4次披起英格兰战衣就轰入5球，近9次为国家队上阵有8个入波，英军前线有佢肯定生晒，就算赛前有快翼艾舒利杨格因伤退队，拥有韦舒亚、禾确特同林柏特等组成嘅进攻线，要入波都应该唔难。值得一提，英格兰今晚仲有上季英超首席本土射手列基林拔候命，呢位有望成为英格兰史上第3大年纪作国家队处子战嘅31岁前锋，如果有机会骚哥利，肯定会搏命争取入波啦!

　　苏格兰呢边，相比起上场赢克罗地亚嘅阵容，虽然获多位主力归队，但三大重臣前锋史提芬费查、中场费查同守将卡达维都继续因伤病问题缺阵。赛前佢哋仲有白礼顿中场比列格鼠蹊受伤退队，前线搵食又要靠已经去咗美职搵食嘅坚尼米拿孭飞，讲实力同卡士真係输晒，就算有超强斗志，都係信唔过㗎!