庄家撑车睇澹曼市双雄

　　经过曼市双雄连续3年雄霸英超，「寸王」莫连奴终于重返呢个全球最激烈嘅足球战场，根据各大庄家赔率，车路士係今季英超冠军大热，曼联同曼城好可能让位，而且莫连奴睇好佢两个哎吔徒弟罗渣士同保亚斯，分别带领利物浦同热刺再起风云，莫氏王朝有可能统治英超!

　　04年莫连奴离开波图首次执教车路士，登陆英超首季就挥低由费格逊领军嘅曼联，带领车仔事隔50年重夺顶级联赛锦标，今次佢重返伦敦，甚至当正自己係英超最高权力：「现时英超当中，只有我同时拎过欧联同英超冠军，随住费爵爷退休，我会成为英超中嘅『教父』，肩膀上有更多责任。」

　　莫连奴自夸英超教父

　　事实上，上星期数据公司彭博体育表示，经过超级电脑分析嘅结果，车仔今季会成为英超冠军，而且各大博彩公司都有一致睇法，大部分开出车仔同曼城并列3.25倍冠军大热，曼联有3.5倍排第3位，立博仲开车仔3.2倍，只得足智彩唔跟大队开曼城冠军赔率得2.5倍，所以唔怪得莫连奴咁牙擦。

　　除此之外，当被问到边队威胁到车仔，莫连奴只係Hea答曼联同曼城依然好劲，阿仙奴可以踢得更好，但提到跟过佢做助手嘅两个哎吔徒弟，就有好多伟论，佢觉得罗渣士会撑番起红军：「点解利物浦唔可以赢联赛冠军?罗渣士好有料，上季佢已经实现自己嘅谂法，咁点解唔可以係利物浦?」

　　撑「徒弟」睇好热刺 红军

　　至于曾经传出被皇马睇中嘅保亚斯，莫连奴觉得佢有条件创造英超历史：「热刺又点解唔可以攞冠军?因为佢哋未攞过?呢个唔係重点，最重要係佢哋有好强劲嘅阵容，而且今年係保亚斯第2年为热刺领军。」讲咁多嘢，寸王都係想话畀大家知，佢嘅足球哲学天下无敌，跟过吓佢已经劲过好多人呀!