西甲又造福亚洲球迷!为咗开拓亚洲市场，西甲今季继续推出「超早场」赛事，赛会喺前日公布嘅第3轮赛程中，皇马大战毕尔包嘅赛事将会喺香港时间傍晚6点上演，唔使捱眼瞓都有得睇!

　　球迷票选C朗夺金靴

　　持有最大西甲转播权嘅Mediapro曾宣布会推出愈嚟愈多早场赛事，以照顾亚洲球迷嘅需要，其中皇马亦一直积极配合呢项安排，所以今季首场超早场由「银河舰队」担大旗亦都係意料中事。根据西甲赛会前日公布嘅第3轮赛程，皇马将会喺香港时间9月1日傍晚6点(西班牙时间中午12:00)喺主场迎战毕尔包，一众亚洲嘅「皇马趸」就可以精精神神咁睇爱队比赛，唔使捱更抵夜喇!

　　西甲开锣在即，西班牙《马卡报》亦特别就「谁会夺得西甲金靴」搞咗个投票，喺寻晚截稿前，C朗拿度仍以近5成嘅得票率，力压紧随其后嘅美斯暂列球迷心目中嘅「一哥」，至于第3名嘅韦拿只获约4%票数，排第4嘅尼马更仅得1%，证明大部分球迷都觉得今季仍然会係「两大天王」嘅世界。