今晚德乙卡尔斯鲁厄主场斗格雷特霍夫，仔细啲睇原来係上季德丙盟主斗德甲榜尾嘅对决。双方季初开局战绩虽然都係咁标青，但格雷特霍夫进攻核心迪祖迪积日前证实重创长抖，相信难以延续连胜强势，平手盘撑卡尔斯鲁厄。 (有线64及203周六凌晨0:30直播)

　　卡尔斯鲁厄中坚马田史杜尔，早两日喺训练期间再次蹠骨骨折，相隔唔够一年再受重创，寻日接受手术后要长期休养，好在呢位仁兄并非防线核心，影响微乎其微。反而最重要嘅係上轮作客恩高斯达特前，报称背痛缺阵嘅射手米简斯基，最终正选登场兼先拔头筹，今场同状态弗爆、连续两场建功嘅阿里巴斯联手破敌，唔使怕入唔到波。

　　格雷射手重创火力削弱

　　客军格雷特霍夫上季喺德甲包尾，明显衰在进攻弱鸡，今季痛定思痛睇得出喺呢方面下过苦功，佢哋除早前热身赛对根克勒比尔利吉揸流摊输波之外，喺德乙及德国盃录得4连胜佳绩，每场都攻入两球暂列德乙榜首。点知顺风顺水之际，开咧后几场踢足嘅前线核心迪祖迪积，喺上轮斗凯沙罗顿时重创，赛后证实前十字韧带撕裂有排抖，今场改由梅连斯基与阿斯美担正，呢两位后生仔欠缺火候，好难恶得出样。