一队3个龙门都伤晒，另一队就刚啱炒咗教练，骑呢到搵总经理教波，鸟栖砂岩、大宫松鼠两支最黑嘅日职球队对碰，今场波唔玩1.62倍入球大，仲有乜好玩呢?(有线18周六晚6:00直播)

　　如果计黑仔程度，今日主场嘅鸟栖砂岩都算极品，由第一至第三号龙门早赤星拓、室拓哉同奥田达朗全部打柴，完全无人守龙，搞到要向清水借用林彰洋，再越级提升福冈大学个21岁o靓仔藤岛荣介，先至唔使中门大开。但係好衰唔衰，前日连锋将野田隆之介都伤埋，真係顾得头嚟脚反筋，黑到冇人有。

　　松鼠炒教头搵GM领军

　　大宫松鼠呢?联赛惨遭5连败，激到班头头生虾咁跳，5日前怒炒鬼佬教头维迪尼克，叫总经理冈田武行顶档教波。问题係，一个GM如果识教波，早就做咗Coach，使乜走去管行政吖!何况大宫最大问题係后防唔掂，倾紧嗰件澳洲国脚卢卡斯尼尔又未签约，刚啱罗致嘅仙台中场和田拓也莫讲唔係踢开后衞，就算係都同队友冇默契啦，对条防线根本冇乜帮助。

　　好嘞，两边后防都唔多掂，咁你会玩边瓣吖?唔使讲一定係博入球大喇，何况鸟栖由99年起主踢13战大宫，开咗9大4细，条摊路清清楚楚摆响度，无谓拗气喇!