史杜列治回归锋力劲

　　阔别三个月，小妹再次同《太阳报》嘅读者见面啦!相信各位英超迷哥迷姐同小妹一样，等英超开锣等到颈都长埋，今日新季第一击，决定支持喺热身赛表现出色嘅利物浦，可以喺主场拥趸面前轻取史笃城。

　　上季冲击欧洲赛席位失败嘅利物浦，喺季前热身赛嘅表得凼到支持者鬼死咁开心，7场录得6胜1负、攻入14球仅失2球嘅靓绩，确係畀到「红军迷」信心。虽然利记今夏一直畀苏亚雷斯嘅转会风波困扰住，但庆幸6月尾加盟嘅西班牙锋将伊亚高艾斯巴斯表现抢镜，喺热身赛中贡献咗4个入球、3个助攻，表现博得领队罗渣士盛讚。

　　史笃城晓士带乜都唔掂

　　咪忘记史杜列治今晚会强势复出担正，睇佢前排后备落场对些路迪同纽卡素两仗嘅表现，就知呢位射手已经归位，返晒嚟啦!今晚由佢喺锋线孭重飞，配合「古天乐」菲腊比古天奴，唔使担心利物浦会冇波入。

　　係，从两军近年对赛往绩睇嚟，史笃城绝对称得上係利物浦嘅剋星，自从2011年2月开始，红军未试过喺英超赢史笃城，不过今时唔同往日，由罗渣士带领嘅红军又年轻又有活力，一众新星喺老大哥谢拉特带领下愈战愈勇，威番次都唔奇吖!

　　最重要一点，就係以前嘅史笃城其实係一支好烂打嘅球队，可惜领队之位由有料嘅佩尼斯，换上踢波一流、教波九流嘅晓士，呢位老哥带曼城同昆士柏都唔掂，更何况质素同财力差一大截嘅史笃城?今晚想捧「史军」嘅朋友都係睇定啲，係都等佢哋返主场先算啦!