阿仙奴今晚喺英超开咧战主场对阿士东维拉，好有机会「大」开杀戒!原因係兵工厂中后场唔齐脚，逼住以守代攻，加上「热身赛狂人」基奥特突然弗到漏，领队云格今季结束后约满，需要省靓招牌避免衰收尾，杀气盛捧1.48倍入球大!(now620、621台及广东体育周六晚10:00直播)

　　伤兵问题同阿仙奴似乎永远分唔开，未开咧佢哋已经有左闸蒙利尔同队长华美伦唔踢得，连中场最肯守嘅阿迪达都最少要抖6周，咁嘅情况，就算翼锋禾确特喺国际赛受伤，都惟有丧攻抢分凼球迷开心，唔好忘记，地位不稳嘅射手基奥特喺7场季前热身赛劲入8球呀!

　　云格争成绩续约

　　云格喺赛前记招都话，阿仙奴今季就算唔买人都唔会有啲乜嘢危机，摆到明对呢位法国射手投以信心一票，相信基奥特点都会打争气波，今晚大把机会骚哥利。仲有呀，今季係兵工厂领队云格合约最后1年，听佢口气，应该係想续约教到退休为止，如果係咁，新球季主场首战点衰得呀?梗係要攻啦!

　　另一方面，维拉有队长李察邓尼离队，佢哋上季失球数字高企，依家防线要重新适应，作客绝对唔似顶得住兵工厂炮火，不过佢哋除咗有射手宾迪基留队，仲买咗个洛斯查兰特前锋历卡斯希伦尼斯帮手，证明领队林拔肯谂计减轻宾迪基嘅负担，玩入球大啱数。