主场对赛逾百年未输过

　　莫连奴回归英超第一击今晚爆发!「寸王」喺西甲畀人闹住走，家阵重返英超呢个发迹地，新季目标梗係带领车路士重夺联赛冠军啦!「蓝战士」近年踢开锣战特别醒神，今晚主场对住升班队伍侯城摆明係大炒格，就算让到「-2」，2.25倍「让主」都信得过。(now620及621台、广东体育周日晚11:00直播)

　　曼车战前买唔到朗尼就放弃

　　一向高调嘅莫连奴寻日拉大队去史丹福桥练波，率先同班球迷打声招呼，赛前佢贯彻语不惊人死不休作风，先向《标准晚报》批评近年英超强队质素下降，跟住又向英国《每日快报》透露为收购朗尼Set咗个Deadline，如果当地时间8月26日仲签唔到「魔童」嘅话，佢就会物色其他前锋，呢个死线日正正係车路士造访曼联嘅大日子，唔通「寸王」想出口术玩心理战?

　　侯城目标今季赢10场

　　点都好，莫帅首要目标係打响回归头炮，虽然后衞大衞雷斯、艾斯派古达同前锋域陀摩西斯因伤同体能问题悉数缺阵，不过车路士人才济济，自1905年以嚟主场斗侯城成百年都未输过，今晚缺少上述3将根本唔係咩大问题，何况外借回收嘅卢卡古喺季前赛丧入5球，有呢位「新杜奥巴」配合夏萨特同舒贺尔尼攻坚，侯城防线肯定有得震冇得瞓!

　　侯城时隔3年重返英超，领队布鲁士订下「赢10场」目标力争护级，不过亨格比利就唔睇好「老虎仔」嘅开季表现，皆因计埋新加盟嘅侯度史东同积基李华摩亚，佢哋今夏足足有10位生力军，磨合需时，造访近14次开锣战赢足12场兼狂入36球嘅「蓝战士」，想输少球都难咯!