巴塞今晚展开衞冕西甲第一击主场迎战利云特。呢场係「地上最强」新帅马天奴接掌后嘅首场正式赛事，梗係要好好睇睇，虽然美斯刚伤愈未必担正，但有「新比利」尼马配合埋巴塞原有班底，要数番几粒都唔係问题，加上佢哋仲未买到具质素中坚填补后防漏洞，入得又失得，入球中位数开到3.5，都照捧1.59倍入球大啦!(now632台周一凌晨1:00直播)

　　马天奴今场会成为巴塞近30年嚟，第10位喺西甲开咧日迎来处子战嘅教头。呢位阿根廷教头一上任，就获得一众球星激讚，沙维仲话：「佢係个天生领袖，唔止好有才能同经验，工作上亦准备充足。」上任冇耐已经咁得人心，唔怪得「地上最强」喺季前热身赛嘅表现咁对办啦!佢哋喺6战中获得4胜1和1负，更有3场攻入至少7球添!

　　美斯复操准备搏杀

　　今场嘅焦点毫无疑问将会落喺巴塞新援尼马身上，呢位「新比利」除咗夺得应届洲际盃嘅最佳球员外，喺热身赛亦都已经「开斋」，马天奴盛讚佢已经极速融入球队，当然要入番几粒打响头炮啦!依家就连前日啱啱复操嘅美斯、法比加斯同柏度洛迪古斯都仲话要落场搏杀，就知巴塞上下士气几咁高。

　　利云特有力偷鸡

　　不过「地上最强」都唔係冇隐忧o架，巴塞上季喺欧联点样畀拜仁「血洗」，小妹仲记得好清楚，中坚位置係佢哋弱点，不过到呢刻都仲未买到人，今场仍然靠碧基一个顶住，马斯真兰奴要继续做替工，意味住防线漏洞仍然存在。

　　利云特同「地上最强」嘅实力虽然相差一段距离，但佢哋喺热身赛表现唔错，加上有艾云舒捷斯同阿莱斯朗恩呢啲攻击手来投，随时可以靠反击喺巴塞身上偷鸡。