苏尔达杜孭飞火力劲

　　今季英超冠军普遍认为係车路士、曼联同曼城之争，至于关键嘅第4位，就以热刺、利物浦同阿仙奴最大机会，成个暑假饱受加里夫巴利转会问题困扰嘅热刺，今晚就会作客升班球队水晶宫，小妹认为热刺已经买咗一大批好球员，就算放走加里夫巴利都唔成问题，今场好大机会旗开得胜!

　　4件新兵都係球坛抢手货

　　虽然上季英超入咗21粒兼成为双料足球先生嘅加里夫巴利死要过皇家马德里，保亚斯亦证实呢位威尔斯快翼今晚唔会上阵，中场丹普西、侯度史东及后衞加拿斯亦都已经离队，正正好多人都担心热刺可唔可以延续近季强势之际，保亚斯就先后入咗几件「靓货」，包括华伦西亚射手苏尔达杜、巴西国脚中场荷西保连奴、川迪指挥官查迪尼同啱啱来投嘅法甲新星伊天卡普尔，呢四位新兵早已成名，仲係今夏转会市场抢手货，质素比几位离咗队嘅球星仲要好!

　　当中小妹最寄予厚望嘅，当然係西班牙国脚苏尔达杜啦!呢位「型佬射手」係西甲最多产嘅前锋之一，上季上阵46场入咗30球，每次落场仲鬼死咁搏命，有佢拍住艾朗连侬同迪科尔，热刺嘅火力认真唔讲得笑!

　　水晶宫入波要靠40岁菲腊斯

　　另边厢，水晶宫仅靠升班附加赛夺得最后一个英超席位，最大功臣肯定係韦费特沙夏，同埋上季有30个联赛入球嘅格连梅利，可惜呢Pair箭头一个已经回归曼联，一个就喺升班附加赛重伤，今仗未必披甲，斋靠新兵查马克同年届40岁嘅菲腊斯数胡，边靠得住呀?

　　仲有一点，就係水晶宫将帅严重缺乏英超经验，领队荷路维只係带过黑池踢顶级联赛一季，队长柏德列麦卡菲更加未踢过英超添!无论经验、名气同战绩，热刺都佔尽优势，撑1.65倍客W啦!