今季首次喺《太阳波经》同大家见面，「四眼哥」决定倒偶像邓加(图)米，推介佢教嘅国体会对家明尼路，撑「让客」。(开赛时间：周一清晨5:30)

　　想当年，一把年纪嘅邓加带领磐田山叶喺香港大球场KO快译通，「四眼哥」喺现场睇到热血沸腾，呢位前巴西国脚刚柔并重，玩脚法可以一个扭你几个、玩硬淨亦可以一个爆你几件!

　　上仗失分想打执波仔

　　不过，同笠臣、晓士、古列治一样，偶像邓加似乎都係踢波叻过教波，连巴西国家队都教得麻麻哋嘅佢，上年十二月返番去出身球会国体会做教练，结果球队以第10名冲线。今季国体会起步算唔错，一直位处前列，但唔知做乜，上月底输完畀纽迪高后变咗和波专家，连续三场和波拎得3分。眼见队波突然走样，偶像啲火就嚟喇，上场作客落后紧畀保地花高嗰阵，佢竟然失控想郁人哋个执波仔，之后仲畀电视台影到佢一路行出球场、一路「问候」人，认真肉酸。

　　眼见波士失分失到失控，国体会班球员会唔会受影响，「四眼哥」唔敢讲，但本来人脚已经唔多充裕嘅国体会，近期陷入伤兵潮先係踢极唔晓赢嘅主因。据报国体会前中后三线都有主力打柴，当中防线更加係重灾区，即使有主场之利，面对由朗拿甸奴领军嘅明尼路，如果和波都已经执到，不过「四眼哥」就睇死佢哋会输埋囉!