今季德甲众师实力平均，连升班球队哈化柏林首轮都可以喺主场以6:1炒法兰克福，唔少球迷都畀佢哋吓一跳。不过哈化今晚作客纽伦堡，未必可以延续强势，事关纽伦堡有日本天王清武弘嗣同德国前锋丹尼尔真锡克领军，配合一班新加盟嘅实力分子，嚟紧肯定会愈嚟愈强大，今仗主场出击有力开2.25倍W!(有线61、64、201及203周日晚9:30直播)

　　纽伦堡中场清武弘嗣上季大放异彩，依家已经成为德甲一线球星，查实呢间球会增兵向来几有眼光，季前向多蒙特买入22岁新星丹尼尔真锡克，呢位土炮射手首仗已经开斋，假以时日，可能又係另一件贵价球星!

　　哈化以乙组人脚做骨干

　　讲到防线，纽伦堡亦罗致咗中坚马田安加，呢位只得19岁嘅瑞士守将係国家青年军常客，前年先出道，由U17一路踢到上U21，係阿仙奴青训产品，佢喺青年军比赛踢咗几场好波，就即刻被纽伦堡收归旗下，家阵有瑞典大哥柏尼尔逊傍住，相信安加仔好快就可以独当一面。

　　对家哈化柏林喺开咧战係威係势，大炒法兰克福叫人另眼相看，不过佢哋基本上只係以上季乙组人脚为骨干，暑假只係重点签入日本球星细贝萌，人脚未必足够应付连场硬仗，何况佢哋件后衞法兰斯要坐波监，今仗作客去到纽伦堡，未必可以好似上场波咁踢得清风送爽，捧主队着数!

　　顶占笋盘：纽伦堡(主胜)